Redaccion
Santiago de Compostela, 28 de xuño de 2025
O conselleiro de Sanidade da Xunta, Antonio Gómez Caamaño, puxo en valor o modelo galego de atención ás enfermidades raras e avanzou que a nova Estratexia do Executivo galego fronte a estas patoloxías suporá un gran salto adiante na accesibilidade aos tratamentos.
O titular da carteira sanitaria do Executivo galego interveu na inauguración da segunda edición do Congreso Nacional de Esclerodermia para pacientes, que organiza a Asociación Española desta enfermidade e que se está a celebrar no salón de actos da Consellería de Sanidade.
Gómez Caamaño avogou por unha atención multidisciplinar e continuada destes pacientes, subliñando a especial sensibilidade de Galicia fronte ás enfermidades raras. Lembrou que Galicia conta cun rexistro de pacientes que axuda a coñecer mellor a realidade das persoas que padecen estas patoloxías e, deste xeito, poder ofrecer servizos máis adaptados ás súas necesidades.
Tal e como indicou o conselleiro, no Rexistro galego de pacientes con enfermidades raras de Galicia figuran máis de 5.300 persoas, entre elas, 45 con casos de esclerodermia, sendo a gran maioría mulleres.
Detrás destas cifras hai persoas que sofren e afrontan unha vida de desafíos por iso o conselleiro avogou por seguir avanzando e apostando pola investigación e o desenvolvemento de novas terapias, unha dirección que Galicia xa asumiu.
Unidades funcionais multidisciplinares
Na súa intervención, o conselleiro puxo en valor as tres unidades funcionais multidisciplinares para atender pacientes con enfermidades raras: na Coruña, en Santiago de Compostela e en Vigo, para unha atención máis coordinada e eficaz dos pacientes que padecen estas patoloxías.
Xunto ao anterior, lembrou que Galicia tamén é referente no eido da investigación grazas aos seus tres institutos. Concretamente, no Instituto Galicia Sur trabállase actualmente nun proxecto innovador que abrirá novas posibilidades terapéuticas a medio prazo fronte á esclerodermia.
Así mesmo, Gómez Caamaño reafirmou o compromiso do Goberno galego coa prevención por medio de programas como o cribado neonatal ou o proxecto CrinGenEs, que buscan ampliar a detección precoz de enfermidades raras, situando Galicia á vangarda neste campo.
Apoio, información e acompañamento
O titular da carteira sanitaria agradeceu ao presidente da Asociación Española de Esclerodermia, Alfonso Sánchez, a organización deste encontro onde afectados, familiares e profesionais poden compartir experiencias.
Lembrou que esta asociación agrupa a persoas moi distintas unidas pola causa común de ofrecer apoio, información e acompañamento a quen o necesita. Puxo como exemplo das actividades realizadas pola asociación a iniciativa Girasoles en Camino, na que moitos dos asistentes ao congreso de hoxe participaron recorrendo xuntos máis de 100 quilómetros do Camiño de Santiago.
A esclerodermia é unha enfermidade autoinmune crónica que provoca a produción excesiva de coláxeno, facendo que a pel e, nalgúns casos, órganos internos, se endurezan e volvan máis ríxidos.
