RedaccionMadrid, 28 de maio de 2025
A conselleira do Medio Rural, María José Gómez, e o conselleiro do Mar, Alfonso Villares, participaron esta tarde na iniciativa de promoción Galicia sabe a origen, celebrada no restaurante Bancal de Madrid, coa que se puxo en valor a excelencia dos produtos alimentarios do agro e do mar que se obteñen na nosa comunidade.
Este acto, no que tamén estiveron presentes o director da Axencia Galega da Calidade Alimentaria, Martín Alemparte; e o director da Casa de Galicia en Madrid, Luis E. Ramos; contou coa participación de cociñeiros galegos de prestixio que foron os encargados de elaborar diferentes pratos con produtos da nosa comunidade.
A conselleira do Medio Rural aproveitou a ocasión para salientar que os produtos alimentarios galegos son sinónimo de excelencia, dunha calidade que está garantida para os consumidores. Neste sentido, engadiu que isto é o resultado da colaboración entre produtores, empresas do sector e o Goberno autonómico para seguir potenciando o que fai diferentes e competitivos a estes produtos, a calidade.
Por iso, quixo lembrar que Galicia é a terceira comunidade de España con máis selos de calidade diferenciada. A nosa comunidade conta con 36 denominacións de orixe e indicacións xeográficas protexidas que amosan o potencial do sector agroalimentario e do mar galegos.
Pola súa banda, o responsable do Mar puxo en valor a extraordinaria calidade dos produtos que ofrecen as rías galegas, animando con elo ao seu consumo, pois estes conteñen un alto valor proteico para a saúde e son o resultado dunha actividade económico-industrial que representa o 5% do Produto Interior Bruto (PIB).
Co obxectivo de seguir apoiando á cadea mar-industria, Villares destacou as distintas campañas que dende o seu departamento se están a impulsar e a levar cabo, como son a de GALICIA SABE AMAR ou o propio Bono Peixe, dotado con 2,5 millóns de euros, e do que se beneficiarán 50.000 galegos. O obxectivo, remarcou, é que as poboacións do litoral sigan vivindo da actividade que leva asociada, pois isto tamén contribúe a fixar poboación e ao desenvolvemento socioeconómico do territorio.
Ciclo de xornadas
O acto celebrado esta tarde é o primeiro dun ciclo gastronómico de xornadas organizadas baixo un enfoque experimental e divulgativo, impulsado polas consellerías do Medio Rural e do Mar en colaboración con MOM Culinary Institute e o restaurante Bancal.
A iniciativa ten como finalidade a posta en valor dos produtos galegos do agro e do mar con accións gastronómicas dirixidas ao público final mediante a participación de cociñeiros galegos de recoñecido prestixio. Nesta liña, búscase reforzar a identidade de Galicia como referente en calidade e xerar visibilidade tanto a nivel autonómico como nacional.
