Redaccion
O Concello da Coruña deu a coñecer hoxe a programación completa do Orgullo Coruña 2025, que se desenvolverá do 26 de xuño ao 17 de xullo baixo a marca consolidada ‘Coruña Orgullosa’ e o lema ‘Aquí, alí, en todos lados‘.
«Queremos visibilizar que as persoas LGTBI están presentes en todos os ámbitos da sociedade e que a nosa cidade é, ante todo, un espazo de seguridade e diversidade», subliñou a concelleira Nereida Canosa durante a presentación.
Este ano a campaña ofrece máis de vinte propostas culturais, formativas e festivas repartidas polos barrios do Ventorrillo, Os Castros, Monte Alto, A Agra e o centro urbano, «para garantir que o Orgullo se viva en cada recuncho da cidade», apuntou a edila. Entre os pontos fortes da programación figura a celebración dos 20 anos do matrimonio igualitario en España.
Este ano a alcaldesa, Inés Rey, presidirá unha recepción institucional no salón nobre para honrar as primeiras parellas LGTBI que oficializaron a súa unión na cidade, para así recoñecer a súa valentía e o seu legado na loita polos dereitos civís.
A programación inclúe tamén a segunda entrega do Premio Tomás Fábregas, instaurado en 2024 para distinguir anualmente persoas ou entidades que sobresaian na defensa dos dereitos LGTBI, e perpetúa a memoria e o compromiso do histórico activista coruñés.
Principais actos da programación
26 de xuño: O Orgullo Coruña 2025 bota a andar cun programa de radio en directo, Xénero, raza e sexualidade, no espazo cultural Galgo Azul, e coa inauguración no Ágora da exposición itinerante Sen Cancelas, que poderá visitarse ata o 17 de xullo.
28 de xuño – Día Internacional do Orgullo LGTBI: A xornada comeza coa Feira das Entidades e a carpa A diversidade visible no Obelisco e continúa no Ventorrillo, onde o Orgullo de Barrio encherá a praza de música, contacontos e actividades durante todo o día. Pola noite, logo de que a manifestación culmine en María Pita coa lectura do manifesto, haberá un concerto de PAVA e o Coro Cores.
1-3 de xullo – Cine con Orgullo: O Campo da Leña convértese en cinema ao aire libre ás 22:00 h, con proxeccións de The Queen of My Dreams, Te separas mucho e unha sesión de cinema galego, todas presentadas polas súas directoras.
7 de xullo – 20 anos de matrimonio igualitario: Recepción institucional no Palacio Municipal ás primeiras parellas LGTBI que se casaron na cidade, homenaxeando o seu papel pioneiro hai dúas décadas.
8, 10 e 15 de xullo – Obradoiros no Espazo Diverso: Tres citas formativas: Nomearnos é existir (narrativa), A túa voz, a túa identidade (logopedia) e Entre corpos (encontro vivencial).
16 de xullo – Orgullo de Barrio Monte Alto: Obradoiro de pandeireta inclusiva, creación dun mural da ilustradora Iria Fafián e entrega da segunda edición do Premio Tomás Fábregas no salón de plenos.
17 de xullo – Clausura: Conversa Falemos do chemsex no Domus, con especialistas en saúde, e actuación acústica de Gael de Papel para poñer o broche final.
A celebración esténdese por toda a cidade para converter rúas, prazas e espazos culturais nun encontro aberto onde reivindicación e festa van da man.
