Redaccion
Santiago de Compostela, 16 de xuño de 2025
O conselleiro de Sanidade, Antonio Gómez Caamaño, avanzou hoxe que o próximo Plan de saúde mental priorizará a atención ao benestar emocional da poboación infanto-xuvenil.
Así o asegurou no transcurso da inauguración, en Santiago de Compostela, do segundo ciclo Saúde Mental en Galicia, organizado pola Xunta en colaboración coa Fundación Araguaney.
Na súa intervención, o titular de Sanidade da Xunta resaltou o esforzo do Goberno galego na mellora da saúde mental, dándolle máis peso no organigrama administrativo, ao crear a Subdirección Xeral de Atención á Saúde Mental, ao incrementar o número de profesionais e aumentar a oferta de formación de especialistas.
De feito, na actualidade Galicia conta co dobre de psiquiatras, psicólogos clínicos e enfermeiros especialistas contratados que en 2009. Ademais, na recente convocatoria de formación sanitaria especializada ofértanse 58 novas prazas formativas relacionadas coa saúde mental entre psiquiatría, psiquiatría infantil, psicoloxía clínica e enfermería especializada.
Gómez Caamaño destacou, ademais, que Galicia foi pioneira na posta en marcha do proxecto YAM, unha iniciativa promovida pola Xunta para incidir no coidado da saúde mental da mocidade e previr a conduta suicida que neste curso chegou a case 5.000 estudantes de 79 centros educativos de secundaria.
Ciclo de saúde mental
Organizado pola Consellería de Sanidade en colaboración coa Fundación Araguaney, na xornada de hoxe abordouse a relación existente entre as redes sociais, a mocidade e a súa saúde mental, unha temática de gran actualidade que precisa dunha reflexión polo miúdo para poder acompañar aos mozos e mozas galegas no seu uso responsable, consciente e equilibrado.
O titular da carteira sanitaria da Xunta apuntou que os datos que derivan do binomio mocidade-redes sociais son preocupantes pois, o 74 % das rapazas menores de 21 anos afirman sentirse afectadas pola presión estética nas redes; preto do 45 % do alumnado recoñece perder tempo de estudo polas redes sociais, e un de cada cinco mozos e mozas cre que estas plataformas causan máis prexuízos ca beneficios.
Este ciclo busca, precisamente, abrir un espazo de reflexión crítica onde escoitar, comprender e actuar de forma informada.
O conselleiro rematou a súa intervención agradecendo á Fundación Araguaney a súa colaboración e a todos os participantes na xornada o acompañar na tarefa colectiva de avanzar no benestar emocional da nosa sociedade.
