Redaccion
A Coruña, 5 de xuño de 2025
A conselleira de Política Social e Igualdade, Fabiola García, puxo en valor o compromiso e esforzo de entidades como o Grupo Social Once, que, segundo destacou, “teñen contribuído de xeito significativo ao avance social de Galicia”. Así o asegurou na gala dos Premios Solidarios que esta entidade organiza cada ano na cidade da Coruña e que suma xa a súa décimo sétima edición.
Na súa intervención, a conselleira felicitou ao Grupo Social Once por ser “un auténtico referente en inclusión e economía social” e por ser “exemplo de innovación, accesibilidade e desenvolvemento sostible”. Ademais, agradeceu a súa colaboración coa Xunta ao longo destes anos “na construción dunha sociedade máis xusta e máis igualitaria”.
A conselleira tamén puxo en valor que Galicia “é terra solidaria” e puxo como exemplo ás persoas, empresas e entidades premiadas nesta edición, que “entenden e practican a solidariedade como forma de vida”.
Entre as empresas e entidades elixidas para recoller estes Premios Solidarios do Grupo Social Once atópase o Centro Dramático Galego (CDG), dependente da Xunta de Galicia e que foi recoñecido pola súa aposta pola accesibilidade, na que colabora a Consellería de Política Social e Igualdade. Tamén foron recoñecidas pola súa labor a empresa Arroupa-Moda Re, impulsada por Cáritas; a entidade Proxecto Home e o xornal La Voz de Galicia. Na categoría de galardóns a persoas físicas, foron premiados Ibrahima Diack e Magatte N’Diaye, os dous mozos que trataron de salvar a vida de Samuel Luiz en 2021.
