RedaccionRibadeo (Lugo), 1 de xuño de 2025
A conselleira do Medio Rural, María José Gómez, acompañada polo delegado territorial da Xunta en Lugo, Javier Arias, visitou esta mañá o Hotel O Cabazo, no concello lucense de Ribadeo, que vén de mellorar as súas instalacións grazas a unha achega do Grupo de Desenvolvemento Rural (GDR) Terras de Miranda no marco da intervención Leader. Durante o seu percorrido polo establecemento, Gómez salientou o potencial desta medida para favorecer a creación de emprego nas contornas rurais.
A conselleira explicou que a reforma das instalacións contou cun investimento de algo máis de 128.000 euros para derrubar a primeira fase do hotel e así poder construír 12 habitacións novas, que reúnen as características necesarias para aumentar a súa categoría e contar con catro estrelas. Este orzamento tamén permitiu acondicionar a planta baixa na que se atopan a recepción, a cafetería e a área de estar.
María José Gómez destacou a importancia da intervención Leader, que procura impulsar o desenvolvemento rural a través dunha estratexia participativa, baseada nun enfoque de abaixo a arriba, garantindo a participación activa dos principais axentes locais nestas políticas. Incidiu en que esta medida ten unha repercusión moi positiva sobre o tecido socioeconómico das zonas rurais debido á súa contribución á creación de postos de traballo. De feito, na convocatoria anterior, foron 1.100 empregos novos os que se chegaron a apoiar.
Convocatoria 2025
A conselleira lembrou que a finais do mes de abril publicouse no Diario Oficial de Galicia (DOG) a convocatoria das achegas para a execución en apoio de terceiras persoas ao abeiro da intervención Leader, no marco do Plan Estratéxico da Política Agraria Común 2023-2027, dotadas cun orzamento de 12,6 millóns de euros.
Estas achegas son xestionadas polos GDR e con elas financiaranse iniciativas que supoñan a posta en marcha de proxectos produtivos xeradores de emprego e de proxectos non produtivos que beneficien ao conxunto da poboación en xeral.
Como novidade neste período da intervención, a conselleira destacou que esta convocatoria inclúe o Bono Activa Rural. Trátase dunha subvención baseada nun importe de axuda a tanto global destinada á creación e posta en marcha de actividades non agrarias nestas contornas, cunha aportación máxima de ata 18.000 euros. Esta axuda non está vinculada á xustificación de ningún gasto ou investimento, senón que se relacionará co mantemento da actividade e co cumprimento do plan empresarial presentado pola persoa seleccionada durante, polo menos, cinco anos.
Case 57 millóns de euros ata 2027
A intervención Leader está dotada con 56,9 millóns de euros ata o ano 2027. Deste orzamento, 17,6 millóns foron destinados para sufragar os gastos de funcionamento dos GDR e os 39,6 millóns restantes teñen como fin financiar as operacións a terceiros.
Durante o período anterior, mentres a intervención estivo incluída na medida 19 do Programa de Desenvolvemento Rural (PDR) de Galicia, o programa Leader permitiu aprobar máis de 1.500 proxectos, consolidar máis de 4.000 empregos e crear uns 1.100 novos. Así, mobilizáronse máis de 169 millóns de euros, cunha axuda pública de 77,5 millóns de euros para operacións a terceiros.
