RedaccionLugo, 17 de xullo de 2025
O conselleiro de Emprego, Comercio e Emigración, José González, acompañado polo delegado territorial da Xunta en Lugo, Javier Arias, o secretario xeral de Emprego e Relacións Laborais, Pablo Fernández, e o director xeral de Comercio e Consumo, Gabriel Alén, clausurou esta tarde a xornada divulgativa para autónomos e comerciantes organizada por APE Galicia, na que tamén estiveron presentes representantes do sector da provincia de Lugo.
Durante o acto, González destacou o compromiso da Xunta de Galicia por apoiar de maneira transversal ás persoas autónomas, clave no tecido produtivo galego e no pulo de sectores absolutamente estratéxicos como o comercio. Galicia é a segunda comunidade con maior proporción de persoas autónomas respecto ao total de afiliacións, cun 19,29 %, porcentaxe que en Lugo supera o 24 %. Neste contexto, puxo en valor as políticas públicas centradas en ámbitos prioritarios como a remuda xeracional, o emprendemento, a formación continua e o acompañamento personalizado.
A este respecto, lembrou que todas as persoas interesadas en traspasar un negocio en Galicia poden acudir á Rede de Polos —con cinco oficinas activas na provincia de Lugo, en Friol, Mondoñedo, Sarria, A Fonsagrada e Monforte de Lemos, que en conxunto xa atenderon preto de 1.000 proxectos emprendedores— para darlle visibilidade á súa oferta e solicitar ao persoal técnico asesoramento no proceso de transmisión. Ademais, mencionou que teñen á súa disposición apoios económicos clave como o Bono remuda (1,2 M€) que este ano engade como novidade —ás axudas xa incluídas para quen asume o relevo—, apoios para quen traspasa por xubilación. Esta é unha das cinco liñas que, por primeira vez, se unifican no paquete de axudas para autónomos, dotado con máis de 40 millóns de euros. Nel inclúense tamén outras medidas, como o Bono Autónomo Concilia, que ofrece apoio á contratación dunha persoa traballadora para cubrir situacións como unha baixa por maternidade ou paternidade, así como para contratar persoal ou facer fronte a gastos relacionados con centros ou servizos de atención ao coidado de menores ou maiores ao cargo.
Xunto a estas axudas, José González destacou tamén o impulso a ferramentas innovadoras como o chatbot de intelixencia artificial da Oficina Virtual do Emprego Autónomo, deseñado para resolver dúbidas de forma inmediata e accesible. Ademais, avanzou a próxima posta en marcha da Academia Virtual para persoas traballadoras autónomas, unha plataforma dixital que ofrecerá formación e asesoramento práctico para mellorar a xestión e o rendemento dos seus negocios. Este novo espazo permitirá acceder, en calquera momento e desde calquera lugar, a contidos flexibles e adaptados ás necesidades do colectivo, con especial atención a aspectos como a tramitación administrativa, a fiscalidade ou a rendibilidade empresarial.
O comercio como sector clave
O conselleiro puxo tamén en valor a importancia do sector comercial en Galicia, que conta con máis de 32.000 establecementos e xera preto de 107.000 empregos, cun papel protagonista do colectivo autónomo. Neste sentido, referiuse ao actual Plan Estratéxico do Comercio de Galicia 2025-2030, dotado con máis de 320 millóns de euros, co obxectivo de reforzar a visibilidade e dinamización do sector.
Con esta folla de ruta, a Xunta aposta por un modelo de comercio máis competitivo, moderno e conectado coa sociedade, que garanta a súa continuidade e o seu papel esencial nas vilas e cidades galegas. Entre os principais eixes do plan destacan a remuda xeracional e a conexión coa mocidade, tanto para fomentar vocacións emprendedoras como para fortalecer o vínculo dos máis novos co comercio de proximidade. A formación continua, especialmente a través de accións de microformación, é outro dos piares fundamentais desta estratexia.
