Pablo Arranz
Sarria (Lugo), 4 de xuño de 2025
O conselleiro de Presidencia, Xustiza e Deportes, Diego Calvo, participou hoxe xunto ao delegado territorial da Xunta en Lugo, Javier Arias, na inauguración das XVIII Xornadas xurídicas Román García Varela, onde salientou a necesidade de que as reformas na xustiza dean resposta á sociedade do século XXI como se indica no título desta edición. Nesta liña, salientou que a Xunta aposta por unha xustiza útil, moderna e accesible, con especial atención ás vítimas de violencia de xénero e colectivos vulnerables como os menores ou persoas maiores.
O tratamento especializado nos xulgados de violencia sobre a muller é un dos temas que se abordarán nestas xornadas que manteñen o legado do xurista Román García Varela e converten cada ano o concello de Sarria en referente da axenda xudicial a nivel estatal. De feito, Diego Calvo salientou o prestixio dos participantes e a variedade de temas de actualidade no ámbito da xustiza que se tratarán entre hoxe e mañá na Casa da Cultura de Sarria.
No que se refire aos xulgados de violencia contra a muller, o conselleiro lembrou que a Xunta solicitara ao Goberno central a través da Comisión Mixta co TSXG estender estes tribunais a todas as cidades galegas como os que xa funcionan na Coruña e Vigo, comezando por Santiago. Pero, tal e como explicou Diego Calvo, a falta de vontade do Goberno central impediu arrincar o ano con novas unidades xudiciais, xa que non as comunicou. Nesta liña, aclarou que o Boletín Oficial de Estado (BOE) publicou hoxe o decreto para dotar á comunidade de catro novas prazas de xuíces de violencia sobre a muller na comunidade. En concreto, para Santiago, Ourense, A Coruña e Vigo, cunha praza en cada caso. A Xunta lamenta que no caso da Coruña e Vigo se poñan en marcha a costa de transformar seccións de instrución, o que provocará un aumento nos asuntos neste área.
Na súa intervención puxo en valor o traballo da Xunta para ofrecer unha atención especializada ás vítimas a través das Oficinas de Atención ás Vítimas que, grazas a un novo servizo de asistencia virtual, poderá realizarse por videoconferencia evitando desprazamentos. Ademais, sinalou que mediante un convenio co Consello da Avogacía Galega, as vítimas de violencia sexual teñen a asistencia xurídica gratuíta garantida con profesionais especializados nestes delitos.
O conselleiro tamén destacou a necesidade de avanzar na modernización da xustiza e, pese aos riscos das novas tecnoloxías que se tratarán nunha das mesas, incidiu na necesidade de continuar coa dixitalización da xustiza e o impulso do expediente xudicial electrónico no marco do Plan Senda 2025.
Outro dos asuntos previstos na programación está relacionado coa estabilización profesional coa carreira profesional. Así, lembrou que, á falta dunha regulación a nivel estatal por parte do Goberno central, Galicia foi pioneira na posta en marcha da carreira profesional na Administración da Xustiza ao retribuír a progresión do persoal en condicións similares ás dos empregados públicos da Xunta. Xa se realizaron as convocatorias dos graos I e II da traxectoria profesional e estase a traballar este ano na do grao III, o que supón para este exercicio un orzamento de 6,6 millóns de euros.
Por outra parte, un dos temas de maior actualidade é a actual reforma xudicial coa nova Lei estatal de eficiencia xudicial aprobada este ano. Diego Calvo explicou que Galicia traballa na súa implantación para cumprir cos prazos esixidos pese a que o Goberno central non dotou ás comunidades dos fondos necesarios para a súa posta en marcha. De todas formas, a Xunta xa aprobou o deseño e a estrutura das oficinas xudiciais, así como as relacións de postos de traballo dos rexistros civís, as oficinas xudiciais e as case 270 oficinas de xustiza nos concellos galegos que substitúen aos xulgados de paz e son os que máis cambios rexistrarán coa nova norma.
