Pablo Arranz
Santiago de Compostela, 9 de xullo de 2025
O conselleiro de Cultura, Lingua e Xuventude, José López Campos, respondeu hoxe no Parlamento a preguntas relacionadas coa actividade do seu departamento e nas que reiterou que a Xunta de Galicia garantirá que o novo sistema de xestión procesual que vai implantar o Ministerio de Xustiza estea dispoñible tanto en galego como en castelán.
Neste senso, o conselleiro puxo en valor “o total compromiso do Goberno galego co impulso do uso e prestixio da lingua en toda a sociedade e, nomeadamente, no eido da xustiza”. Por isto, tal e como sinalou, a Administración autonómica traballa xa “para que co novo programa Atenea non se repita o problema sucedido con Minerva, que non estaba preparado para soportar a versión en galego”.
Deste xeito, López Campos explicou que nun primeiro momento a intención do Ministerio de Xustiza era asinar un convenio para ceder este sistema á Xunta de Galicia só en castelán e que fose o Goberno autonómico o que asumira a implantación da lingua galega.
Así, tal e como explicou, “a plataforma figuraba só en castelán e non tiñamos a seguridade de que fora estar dispoñible nas dúas linguas”. Por este motivo, precisou, iniciouse o proceso de diálogo co Goberno central, xunto coa Irmandade Xurídica, “para colaborar co Ministerio e que Galicia teña o que lle corresponde, respectando e favorecendo así o uso do galego”.
Neste contexto, o responsable de Lingua do Executivo galego lembrou que ao abeiro do Pacto pola Lingua xa están funcionando outro tipo de iniciativas para fomentar e prestixiar o uso do idioma na xustiza. Así, a finais do pasado ano, López Campos asinou un convenio co fiscal superior de Galicia, Fernando Suanzes, a través do cal se puxeron en marcha cursos de formación específica en lingua e cultura galegas para persoal deste sector profesional, uníndose así a outros enfocados noutros ámbitos da Administración ou no eido sanitario, e ao que se sumou hai uns días a sinatura dun protocolo de colaboración co Colexio Notarial de Galicia e a Irmandade Xurídica para o impulso do idioma na redacción de documentos públicos.
Neste marco, o conselleiro volveu amosar a man tendida para que todos os grupos poidan traballar de xeito conxunto e consensuado e acadar un acordo “que permita que o galego siga sendo un idioma cheo de vitalidade, mellorando o seu uso nos distintos ámbitos sociais”.
