Pablo Arranz
Santiago de Compostela, 11 de abril de 2025
O conselleiro de Cultura, Lingua e Xuventude, José López Campos, acompañado pola directora xeral de Xuventude, Lara Meneses, participou hoxe no encontro coas persoas mentoras do programa Xuventude Mentoring, que tivo lugar na Cidade da Cultura de Galicia coa participación de máis de 100 persoas participantes nalgunha das seis edicións xa celebradas.
Durante o acto, no que se entregaron trofeos conmemorativos a todas as persoas mentoras e titoras, o responsable autonómico de xuventude agradeceu o labor altruísta e a implicación na mellora das oportunidades da mocidade galega. “Todos os que estades hoxe aquí sodes auténticos referentes para unha xeración que busca camiños, apoio e confianza. O voso labor pode ser un punto de inflexión no paso á vida profesional dunha moza ou dun mozo”, afirmou o conselleiro.
Neste senso, o conselleiro puxo en valor os resultados deste programa, que conta cunha taxa media de inserción laboral superior ao 64 % e que xa beneficiou a máis de 1.000 participantes. “Estas cifras amosan a nosa aposta polo programa Mentoring está consolidada e os datos continúan mellorando cada ano”.
Entidades colaboradoras
A iniciativa promovida pola Consellería de Cultura, Lingua e Xuventude, conta coa colaboración do Consorcio Interuniversitario do Sistema Universitario de Galicia e as tres universidades galegas: Universidade de Santiago de Compostela, Universidade de Vigo e Universidade da Coruña. Ademais, conta co apoio de diversas asociacións profesionais, fundacións, concellos e empresas, que participan activamente tanto no desenvolvemento das accións formativas como na acollida de participantes e na consolidación dunha rede sólida de mentores e mentoras comprometidas co futuro da mocidade.
Contido do programa
O Xuventude Mentoring é un programa integral de formación e acompañamento personalizado que busca facilitar a transición da mocidade cara ao mercado laboral. Dirixido a persoas mozas tituladas e inscritas no Sistema Nacional de Garantía Xuvenil, ofrece titorías individualizadas, orientación profesional por parte de mentores expertos no seu sector, formación en competencias clave para o emprego —incluíndo habilidades dixitais, intelixencia artificial e competencias lingüísticas—, así como actividades de networking e visitas a empresas. A metodoloxía do programa baséase no apoio continuado dunha persoa titora e na vinculación directa co tecido empresarial galego, o que permite coñecer de primeira man o funcionamento do mundo laboral e ampliar redes de contacto profesionais. Esta combinación de aprendizaxe práctica, guía profesional e inmersión no ecosistema empresarial converte o programa nunha ferramenta de alto impacto para a empregabilidade xuvenil en Galicia.
Investemento en oportunidades de futuro
O programa Xuventude Mentoring, xunto coa súa variante na Empresa, supón tamén un esforzo significativo de xestión e investimento por parte da Xunta de Galicia, que destinou xa máis de 6,5 millóns de euros para a súa execución como parte do programa cofinanciado polo FSE+ Galicia 2021–2027. Estes fondos permiten ofrecer formación de calidade, bolsas remuneradas, acompañamento personalizado e o establecemento dunha sólida rede de mentores e empresas colaboradoras en toda Galicia. A elevada taxa de inserción laboral demostra o alto retorno social e económico do programa, que consegue transformar recursos públicos en oportunidades reais de emprego, xerando un impacto positivo tanto na vida da mocidade participante como no tecido produtivo galego.
Finalmente, o conselleiro López Campos puxo en valor o impacto global do programa, sinalando que iniciativas como esta “amosan o compromiso transversal da Xunta coa mocidade, coa igualdade de oportunidades e cun futuro laboral máis esperanzador e próximo para todos e todas”.
