Pablo Arranz
Redondela (Pontevedra), 6 de xuño de 2025
O conselleiro de Sanidade, Antonio Gómez Caamaño, subliñou o desafío que supón tratar a dor e a necesidade de sistemas sanitarios que poñan en marcha programas de vixilancia para o seu control.
Remarcou que, no caso de Galicia, a Estratexia de xestión do cancro prioriza o seguimento axeitado da dor oncolóxica e promove a integración dos coidados paliativos desde as etapas iniciais do tratamento. Así mesmo, a Estratexia de calidade e seguridade do paciente conta cunha liña específica, centrada no apoderamento dos doentes, favorecendo a súa participación nos coidados.
Na inauguración do V Tecnofórum de Dor Oncolóxica celebrado na Illa de San Simón, Gómez Caamaño fixo referencia á atención da dor crónica no primeiro nivel asistencial e ao feito de que xa se fagan rexistros trimestrais desde o servizo de calidade asistencial.
Así mesmo, dedicou unhas palabras de recoñecemento ao persoal sanitario, aos familiares e ás asociacións de pacientes.
As unidades da dor, presentes nas sete áreas galegas, realizaron máis de 44.000 consultas no 2024, incrementando en máis dun 40 % as efectuadas no 2020. Boa parte destas consultas dedicáronse a pacientes oncolóxicos, coa intención de mellorar o control da súa dor.
No 2022, a Unidade da Dor do Hospital Universitario de Ourense converteuse na primeira acreditada coa norma ACDON (Acreditación Dor Oncolóxica) pola Sociedade Española de Calidade Asistencial. Segundo o conselleiro de Sanidade, estes datos avalan a importancia dos comités da dor, que coordinan a actividade asistencial en todos os niveis e garanten un enfoque integral.
No referido á medicación destes pacientes, o titular da carteira sanitaria fixo alusión ao acordo de prácticas seguras con medicamentos opioides, unha acción que se complementa coa información que se imparte nesta materia.
Colaboración e abordaxe multidisciplinar
O V Tecnofórum, centrado na dor oncolóxica, ten un enfoque multidisciplinar. Trátase dun espazo de discusión no que se fomenta a xeración de ideas. Este encontro está liderado por un grupo de médicos pertencentes a diferentes especialidades relacionadas coa dor oncolóxica que desenvolven a súa actividade asistencial nos hospitais do Servizo Galego de Saúde.
Ademais dun curso práctico para os residentes de anestesioloxía e oncoloxía con casos reais, entre as actividades destaca a presentación conxunta das sete áreas sanitarias das principais conclusións sobre o manexo, derivación e organización das unidades da dor oncolóxica. O programa tamén inclúe unha sesión final de humanización e sensibilización.
