Redaccion
Monforte de Lemos (Lugo), 8 de xullo de 2025
A conselleira do Medio Rural, María José Gómez, acompañada polo director xeral de Gandaría, Agricultura e Industrias Agroalimentarias, José Balseiros; e pola directora xeral da Axencia Galega de Desenvolvemento Rural, Paz Rodríguez, visitou hoxe a Gandaría Puluan, situada no concello de Monforte de Lemos. No percorrido, no que participou tamén o propietario da granxa, Antonio Francisco López, a titular de Medio Rural puxo en valor as axudas da Xunta de Galicia destinadas a proxectos de investimento en actividades empresariais non agrícolas, cun orzamento de 2,1 millóns de euros.
Gandaría Puluan é unha das 56 empresas beneficiarias desta última convocatoria, dirixida a pequenas empresas e persoas físicas do rural galego. No seu caso, o apoio permitirá mellorar a planta de procesamento lácteo mediante a incorporación de novos equipamentos e dotación doutros destinados para o espazo dedicado á promoción. No conxunto da convocatoria, 20 proxectos céntranse na transformación agroalimentaria e contribuirán á consolidación de 552 empregos e á creación de 56 novos postos de traballo.
Gómez destacou que esta explotación, cun censo de 269 animais, é un exemplo de innovación no sector primario galego, ao combinar a produción e transformación do leite, unha práctica que engade valor ao produto e mellora a competitividade do sector. Neste eido, a conselleira lembrou que Galicia xa transforma máis do 70% do leite que produce, achegándose ao obxectivo marcado na Estratexia de Dinamización do Sector Lácteo.
A titular de Medio Rural destacou que un dos aspectos máis distintivos da explotación é a elaboración dun queixo macerado con viño Mencía da Denominación de Orixe Ribeira Sacra, o que representa unha maridaxe única e un claro exemplo de vinculación co territorio.
Outras axudas
Cabe destacar que a Gandaría Puluan viuse beneficiada tamén dos fondos Leader a través da posta en marcha de tres proxectos diferenciados. O máis recente, vinculado á convocatoria de 2024, centrouse na adaptación da explotación, da nave de produción de lácteos e da súa contorna, co obxectivo de facilitar a realización de visitas guiadas, actividades de divulgación, promoción e turismo, cunha achega de 70.151 euros.
Tamén contou co financiamento desta intervención Leader para adquirir un vehículo de transporte comercial dotado de caixa isoterma, que permite a comercialización directa de leite fresco pasteurizado, así como para potenciar o uso de enerxías renovables mediante a incorporación dun robot arrimador de comida fotovoltaico automático e a instalación dun sistema de xeración de enerxía solar fotovoltaica para o seu funcionamento.
Ademais, Gandaría Puluan foi beneficiaria doutras achegas para a transformación e comercialización de produtos agrarios, para a renovación de maquinaria agrícola ou da Política Agraria Común, entre outras.
