Pablo Arranz
Monforte de Lemos (Lugo), 13 de mayo de 2025
O programa de educación ambiental da Xunta MeteoEscolas rexistrou este curso 2024-2025 cifras récord de participación ao chegar a máis de 10.300 escolares e a arredor de 700 profesoras e profesores. Estes datos mostran a boa saúde dunha iniciativa que naceu no ano 2012 ao abeiro do Plan Proxecta da Consellería de Educación, Ciencia, Universidades e Formación Profesional e que agora pasou a formar parte do programa máis amplo Mocidade polo Clima.
A conselleira de Medio Ambiente e Cambio Climático, Ángeles Vázquez, puxo de relevo o éxito desta acción durante unha visita ao Centro de Educación Especial Infanta Elena de Monforte de Lemos, un dos 42 centros que participaron na edición do curso pasado de MeteoEscolas e un dos 24 seleccionados como MeteoEscolas Excelentes, aquelas que destacan polo seu bo facer no impulso da investigación sobre o clima e a meteoroloxía demostrando que a ciencia tamén se fai desde as aulas.
A responsable autonómica destacou o interese dos centros educativos por participar neste programa, o que provocou que nos últimos tres cursos acadase o máximo de centros participantes (42 entre Primaria, Secundaria e Educación Especial) e que algúns interesados tivesen que quedar fóra e espera a súa oportunidade en seguintes edicións.
Ángeles Vázquez lembrou que Mocidade polo Clima -paraugas no que se inclúe o programa MeteoEscolas- é unha iniciativa de carácter transversal e pioneira na comunidade coa que se aspira a formar, informar e animar á xente nova de entre 3 e 35 anos a actuar fronte ao cambio climático. Para facelo, é fundamental coñecer que factores inciden nos fenómenos meteorolóxicos e que accións inflúen ou aceleran o quecemento global, para o que é crucial actuar desde as escolas.
Nesta liña, a conselleira explicou que este tipo de proxectos buscan espertar conciencias e formar unha cidadanía comprometida co planeta que permita avanzar nos obxectivos da comunidade de acadar a neutralidade climática no ano 2040, dez anos antes do obxectivo marcado por Europa. Para logralo, incidiu, é vital contar coa participación da mocidade pois vai ter un papel determinante para que esa senda se manteña no futuro.
CEE Infanta Elena
O Centro de Educación Especial Infanta Elena de Monforte de Lemos participou o curso pasado (2023-2024) no programa MeteoEscolas e foi un dos 24 centros recoñecidos como MeteoEscolas Excelentes polo gran traballo desenvolvido para que o estudantado (un grupo de 24 alumnas e alumnos) aprendese distintas nocións sobre o clima e a meteoroloxía existentes na súa contorna.
A responsable autonómica agradeceu ao equipo docente deste centro educativo o seu labor diario e o compromiso coa protección do medio ambiente e lembrou que as pequenas accións son as que contribúen a acadar obxectivos maiores. De feito, animou a todo o mundo a comprometerse con xestos do día a día que semellan simples -como adoptar hábitos relacionados coa eficiencia enerxética como apagar os aparellos electrónicos cando non se usan ou facer unha adecuada xestión e separación dos residuos- para facer fronte ao quecemento global.
